കൊച്ചി: കോല്ക്കത്ത സ്വദേശി സൂരജ് ലാമയുടെ തിരോധാനവുമായി ബന്ധപ്പെട്ട് കളമശേരി സര്ക്കാര് മെഡിക്കല് കോളജിനെതിരെ ഗുരുതര ആരോപണവുമായി മകന് സാന്റണ് ലാമ. നടപടിക്രമങ്ങള് പാലിക്കാതെയാണ് പിതാവിനെ മെഡിക്കല് കോളജില് നിന്ന് വിട്ടയച്ചതെന്ന് സാന്റണ് ലാമ കൊച്ചിയില് മാധ്യമങ്ങളോട് പറഞ്ഞു.
മൊത്തം സിസ്റ്റത്തിന്റെ വീഴ്ചയാണിത്. ഇങ്ങനെയാണോ കേരളത്തിലേക്ക് ഒരാള് വന്നാല് മെഡിക്കല് കോളജും പോലീസും കൈകാര്യം ചെയ്യേണ്ടത്. ഈ വിഷയത്തില് ഹൈക്കോടതിയെ സമീപിക്കുമെന്നും അദ്ദേഹം വ്യക്തമാക്കി.
പിതാവിനെ കാണാതായതിന് പിന്നാലെ ആദ്യം കളമശേരി മെഡിക്കല് കോളജിലെത്തി അന്വേഷണം നടത്തിയപ്പോള് ഇങ്ങനെ ഒരാള് അഡ്മിറ്റായിട്ടില്ലെന്നാണ് അധികൃതര് പറഞ്ഞത്. പിന്നീട് മാധ്യമങ്ങളില് വാര്ത്ത വരികയും പോലീസിനൊപ്പം മെഡിക്കല് കോളജിലെത്തി അന്വേഷിച്ചപ്പോഴാണ് പിതാവിനെ അഡ്മിറ്റ് ചെയ്തിരുന്നതായി അധികൃതര് വ്യക്തമാക്കിയത്.
അജ്ഞാതന് എന്നാണ് പേര് രേഖപ്പെടുത്തിയിരുന്നത്. പിന്നീട മാധ്യമവാര്ത്ത വന്നതിന് ശേഷം അന്വേഷിച്ചപ്പോഴാണ് സൂരജ് ലാമ എന്ന പേര് രജിസ്റ്ററില് കണ്ടെത്തിയത്. പിതാവിന്റെ അസുഖം ഭേദമായത് കൊണ്ടാണ് പറഞ്ഞുവിട്ടതെന്ന് സൂപ്രണ്ടന്റ് പറഞ്ഞു. വിഷമദ്യ ദുരന്തത്തില്പ്പെട്ട് ഓര്മശക്തി നഷ്ടപ്പെട്ട ഒരാളിന്റെ അസുഖം എങ്ങനെയാണ് ഭേദമാകുന്നതെന്നും സാന്റണ് ലാമ ചോദിക്കുന്നു.
രാഷ്ട്രപതിയുടെ സന്ദര്ശനമായതിനാല് പിതാവിന്റെ തിരോധാനത്തില് കാര്യമായ അന്വേഷണം നടന്നിരുന്നില്ല. ജീവനോടെ തന്നെ പിതാവിനെ കണ്ടെത്തി തരുമെന്ന് കമീഷണര് തനിക്ക് ഉറപ്പ് നല്കിയതാണ്. തിരച്ചില് നടത്തിയ എച്ച്എംടി പരിസരത്ത് നിന്നാണ് പിതാവിന്റേതെന്ന് സംശയിക്കുന്ന മൃതദേഹം കണ്ടെത്തിയിട്ടുള്ളത്. മൊത്തം സിസ്റ്റത്തിന്റെ വീഴ്ചയാണിതെന്നും അദ്ദേഹം പറഞ്ഞു.
Deepika
E-paper LOGIN
LOGIN
